Yadullah Qeybullah oğlu Mirzəyev – 12 yanvar 1970-ci ildə Naxçıvan rayonunun Sirab kəndində dünyaya göz açıb. 1977-ci ildə Sirab kənd orta məktəbinin I sinfinə qəbul olunub, 1987-ci ildə həmin məktəbin X sinfini bitirib. 1988-1990-cı illərdə Ukrayna Respublikasında həqiqi hərbi xidmət borcunu yerinə yetirib. 1996-cı ildə Naxçıvan Dövlət Universitetinə qəbul olub, 2000-ci ildə həmin universitetin Filologiya fakültəsini Azərbaycan dili və ədəbiyyatı ixtisası üzrə bitirib.
Hazırda Babək rayonunu Sirab kənd tam orta məktəbində və “Hədəf” kurslarında ixtisası üzrə müəllim işləyir.
04.10.2022-ci ildə Naxçıvan Muxtar Respublikasının “Əməkdar müəllimi” fəxri adına layiq görülüb.
Ailəlidir.
Yadullah Mirzəyev gənc yaşlarından bədii yaradıcılıqla da məşğul olur. Onun şeirləri və hekayələri müxtəlif mətbuat orqanlarında, “Vətən”, “Turan”, “Turan ellərinə salamlar!”, “Ziya”, “Şam işığı”, “Heydər Zirvəsi”, “İlham çeşməsi”, “Odlar yurdu Azərbaycan”, “Canım Azərbaycanım”, “Azərbaycan bayrağı”, “Zirvəyə ucalanlar”, “Zəfəri qazananlar”, “Söz xəzinəsi”, “Poeziya çələngi”, “Qarabağ Azərbaycandır!”, “Dəmir yumruq, polad bilək”, “Qara-Arxac”, “Xarıbülbül”, “Zəfər” və s. ədəbi məcmuələrdə çap olunub.
Nəsr əsərlərindən ibarət “Qisas yanğısı” adlı kitabı 2022-ci ildə “Əcəmi” nəşriyyatında işıqüzü görüb.
Biz də Yadullah müəllimə yeni-yeni uğurlar arzulayırıq və aşağıda onun bir neçə şeirini dəyərli oxucularımıza təqdim edirik!..
Məlahət SAHİBQIZI,
Yurd.İnfo.Az-ın Baş Redaktoru,
AYB-nin və AJB-nin üzvü,
“Abdulla Şaiq”, “Xan qızı Natəvan”,
“XXI Əsrin Ziyalısı”,
“Zirvə”, “Zəfər”, “Qızıl qələm”
və s. mükafatların laureatı
ZiM.Az
ŞƏHİDLƏR XİYABANI
Bu yer ülvi bir məkan, ərlərin mədfənidir.
Vətən üçün ölənin bu torpaq kəfənidir.
Bura şahidlər evi, şəhidlər məskənidir.
Ziyarət yerimizdir, buranı yaxşı tanı,
Müqəddəs and yerimiz – Şəhidlər xiyabanı.
Vətənə aşiq olan eşq badəsini içib,
Gözütək qorumağı özünə amal seçib.
Azadlığa gedən yol bu xiyabandan keçib.
Dolanır həzin-həzin burada qəm dumanı,
Müqəddəs and yerimiz – Şəhidlər xiyabanı.
Hər şəkil bir xatirə, hər şəkil baş daşıdır,
Burda yağan yağış yox, nalənin göz yaşıdır.
Bu yer qəlbi odlanan xalqın qan yaddaşıdır.
Nə vaxt gəlsən görərsən bura insan axını,
Müqəddəs and yerimiz – Şəhidlər xiyabanı.
Keçsə neçə qərinə, ötüşsə neçə ay, il,
Xalq öz igidlərini heç vaxt unudan deyil,
Şəhidlərin qanından rəng alıbdı elə bil,
Tər qərənfil gülünə bürünübdü hər yanı,
Müqəddəs and yerimiz- Şəhidlər xiyabanı.
Bura qürür yerimiz, özünü dərkimizdir.
Bu yer qanla paklaşan həm oçaq, pirimizdir.
“Şəhidə ölü demə, şəhidlər dirimizdir”
Bu, Quran ayəsidir, Yaradanın fərmanı,
Müqəddəs and yerimiz- Şəhidlər xiyabanı.
20 YANVAR GÜNÜ
Candan əziz canından keçdi igid oğullar,
Vətəni candan üstün seçdi igid oğullar,
Əbədi yaddaşlara köçdü igid oğullar,
O qan-qadalı gecə – 20 Yanvar günü.
O gecə azadlığın toxumları əkildi,
70 illik əsarət qandalımız söküldü.
Başımız üstündəki qorxu hissi çəkildi
O qan-qadalı gecə – 20 Yanvar günü.
Dayayıb sinəsini soyuq tank lüləsinə,
Birləşib hay verdilər haqqın batan səsinə.
Qalxdılar şəhidliyin ən ali pilləsinə
O qan-qadalı gecə – 20 Yanvar günü.
O gecə aydınlatdı azadlıq yolumuzu,
Bildik kimdi dostumuz, tanıdıq yağımızı.
Şəhidlər öz qanıyla ucaltdı adımızı
O qan-qadalı gecə – 20 Yanvar günü.
Düşmənin qarşısında basılmaz şirə döndü,
Bir yumruqda birləşib boz qurda hərə döndü.
Şəhid qanı qarışdı, bu torpaq pirə döndü
O qan-qadalı gecə – 20 Yanvar günü.
1995
QARABAĞIN QARTALI
(Şuşanın azad olunmasında rəşadət göstərmiş
Murad Sahiboğlunun əziz xatirəsinə)
Vətən çağırır deyə bir an da ləngimədi
Girdi qızğın döyüşə nəfəsi təngimədi,
Yağdırdı düşmənlərə nifrəti səngimədi
Yağını göz açmağa çox gördü bircə anı
Qarabağın qartalı, yenilməz qəhrəmanı!
Dözmədi ki, torpağı qala yadlar əlində,
Yağılar meydan açıb, at oynada elində,
Qarabağ Azərbaycan! Şüarı var dilində,
Azad görmək istədi bütöv Azərbaycanı!
Qarabağın qartalı, yenilməz qəhrəmanı!
Adı vahimə saldı düşmənin ordusuna,
Öz qanına boyandı, kim çıxdı qarşısına,
Qeyrəti məlhəm oldu Şuşanın yarasına.
Azadlığın nuruyla aydınlatdı səmanı,
Qarabağın qartalı, yenilməz qəhrəmanı!
Onu qorxuda bilməz düşmənin yar-yarağı,
Gah vətənin qayası, gah daş oldu yatağı,
Vətənə olan sevgi, inam oldu dayağı,
Canından əziz olan Vətənə verdi canı,
Qarabağın qartalı, yenilməz qəhrəmanı!
Şəhidlik ən müqəddəs, ən ali bir kəlmədi,
O bir tale qisməti, uca Haqdan gəlmədi.
Cənnətə gedən yola hörülmüş bir ilmədi.
Şəhadətin mübarək! Qəbul eylə duanı,
Qarabağın qartalı, yenilməz qəhrəmanı!
2022
AYAZIM
(Şəhid Ayaz Sultanoğlunun əziz xatirəsinə)
Harayına hay verib Vətənin dar anında,
“Vətən candan şirindir”, – demisən zamanında,
Əzəl gündən gəzmisən şəhidlik sorağında
Niyyətinə qovuşdun- sən uca dağ, Ayazım!
Kimsə çatmaz zirvənə, yurda dayaq Ayazım!
Soyun Göytürkdən gəlir, qorxu olmaz canında,
Qəhrəmanlıq rəmzidir, dövr eləyir qanında.
Düşmənə zərbə vurdun məqamında, anında
Sən Vətənin borcundan çıxdın üzağ, Ayazım!
Oldun Vətənin oğlu, yurda dayaq Ayazım!
Dedin ki, qiyamətə bu ağrı, acı qalmaz,
Oğlu igid Vətənin torpağı girov olmaz.
Vətən müqəddəs –ana, ana, vətən satılmaz.
Getdin dilində şüar, əldə bayraq, Ayazım!
Öc aldın düşmənindən sən bu sayaq, Ayazım!
Düşmənləri mat qoydu cəsarətin, inadın,
Sərdin Vətən üstünə azadlığın qanadın.
Yazıldı tariximə şərəflə şəhid adın
Qaranlığa nur saçan oldun çıraq Ayazım!
Sən Vətənin oğlusan, yurda dayaq Ayazım!
Var olduqca bu Vətən, adın dillərdə gəzər,
İndi sən el oğlusan, səni el əzizləyər.
Elə ucaldıb səni, başın göylərə dəyər
Yolunda qan tökdüyün ana torpaq, Ayazım!
Sən bu elin oğlusan, yurda dayaq Ayazım!
2020
DÜŞMÜSƏN GÖZÜMDƏN
Məhəl qoymamısan çəkilən aha,
Hiyləyə, yalana artıb iştaha.
Təpədən dırnağa batıb günaha
Düşmüsən gözümdən, a gidi dünya.
Əyriyə qul olan düzünü gördüm,
Yalanla dolanan izini gördüm.
Mərdə torba tikən üzünü gördüm
Düşmüsən gözümdən, a gidi dünya.
Aldın şad gününü əldən qılıqla.
Verdin Yadullaha qəmi qalaqla.
Ömrü yaşamamış böldün qalıqla
Düşmüsən gözümdən, a gidi dünya.
BİLİNMİR
Yalan ayaq tutub yeriyir indi
Həqiqət bucaqda çürüyür indi.
Şər meydan sulayıb söz deyir indi
Qarışıb dünyanın halı bilinmir.
Nadan yüz oxuyub çatsa da başa,
Sən ondan yaxşılıq gözləmə, haşa.
Hər yerindən duran əl atır daşa
Kim ağıllı, kimdi dəli bilinmir.
Cahil başa keçib, hikmət qalmayıb
Haramı güdəndən qismət qalmayıb.
Abır əldən gedib, ismət qalmayıb
Həqiqətin izi, yolu bilinmir.
ÇƏKİRSƏN
Zalım fələk, hamı səndən narazı,
Fərq qoyub bəndəyə pozdun tarazı.
Yetimin başına vurub qapazı
Varlının başına tumar çəkirsən.
Kiminin həyatı bərli-bəzəkli,
Kimisi də gün çörəyə həsrətli.
Haqq deyənin yolu daşlı- kəsəkli
Nahaqqın yolunu hamar çəkirsən.
Tökürsən başına qəm, bacasından
İki əlli tutub dərd yaxasından.
Qarnın ovuşdurur yoxsul acından
Yaltağın qabıına nahar çəkirsən
DÖNDÜ
Bir alagözlüyə könül bağladım
Can naşı əlində talana döndü.
Bu eşqin yolunda elə ağladım
Yazda yağan leysan yalana döndü.
Dözümü, səbrimi əlimdən aldı
Ömrümün baharı qart tikan oldu.
Gəlmədi görüşə əlimdə qaldı
Qurudu güllərim xəzana döndü.
Yadullah, uzaqdır o vüsal çağı
Taleyin kəsilib özünə yağı.
Qəlbin öz dərdinə deməkçün ağı
Qəm üstə köklənib kamana döndü.
YER YOXDU SƏNƏ
Mən səni seçmişdim könlümə sultan
Sən demə, eşqin də sözüntək yalan.
Əzəldən sən oldun qəlbimi qıran
Arama, qəlbimdə yer yoxdu sənə.
Sevgimin üstünə duman çökübdü,
Yenicə açırdı, kədər bükübdü.
Qəlbimdə yerinə qəm tökülübdü,
Arama, qəlbimdə yer yoxdu sənə.
Səndə nə sevgi var, nə də mərhəmət,
Sənə könül vermək, düzü, qəbahət.
Sevginin yerini tutubdu nifrət
Arama, qəlbimdə yer yoxdu sənə.
A ZALIM
Ürəyimi oxlayıbdı baxışın
Yenə niyə bəzənibsən, a zalım?
Səndə yoxdu nə mərhəmət, nə insaf
Yenə niyə bəzənibsən, a zalım?
Oda saldın, sızıldayım, göynəyim
Yaxmadığın nə qaldı ki, de nəyim?
Yoxsa məni öldürməkdi istəyin
Yenə niyə bəzənibsən, a zalım?
Yadullaham, günahım nə, denən sən
Suçum yoxsa, gəl imana, dinə sən
Qaş oynadıb can almısan dünən sən
Bu gün niyə bəzənibsən, a zalım?
ZiM.Az
